أجزاء متنافرة فيجب عليك أن تحافظ على وحدة الوطنية وتستجلب - مجلة الأستاذ

أجزاء متنافرة فيجب عليك أن تحافظ على وحدة الوطنية وتستجلب قلوب جميع الوطنيين سواء كانوا مسلمين أو مسيحيين أو إسرائيليين وتلزموا السكون في سيركم ولا تتعرضوا لما يوجب النفرة أو يحدث فتنة في البلاد فإننا أحوج الناس إلى لهدوّ والبعد عن الفتن وهناك أشياء يلزمك أن تعرفها سأُبينها لك في الدرس الآتي إن شاء الله.

‌

‌مدرسة البنات

شريفة وبهية

. ش. أنا رحت لك لحد البيت قالولي دي طلعت برَّا. انا ما انا قايله لك فضك من طلوع برَّا احسن ما حوالهشي إلا الخسارة. ب. أنا كنت في حضرة شتك السيدة. ش. شي لله يا ستي يا طاهرة. وهيَّا السيدة يختي تقول لك فوتي بيت جوزك واطلعي من غير أذنه وخلي الجدعان يتفرَّجوا عليك في السكك. اشمعنا يعني الحضرات اللي طلَّعوها اليوم. لا النبي قال كده ولا عمل حضره في مدنة ولا الصحابة ولا الناس الطيبين. والأيام دي الناس طلعت فيها وكل يوم يطلعوا لنا كلام جنس وأمور ما ترضيش ربنا. ب. دي الحضرة عاملينها للزيارة يعني الواحدة اللي عليها ندر ولَاّ في نفسها حاجة تروح للسيدة نهار الحضرة وتقول لها على بالها فيه وربنا يقضيها لها. ش. بقى يا ستي أنا ما اعرفشي الكلام ده أنا اعرف أن طلوع الواحدة من بيت جوزها من غير أذنه حرام. وزيارة المشايخ من غير أذن الراجل حرام. وليس الواحدة هدومها الكويسة وطولعها في السكة بهم

حرام. وصرفها الفلوس في ندر ولَاّ في قرابة قرآن حتى من غير أذنه حرام والواحدة إن طلعت من غير إذن جوزها تفضل الملائكة تلعن فيها وهيَّا رايحة وهيَّا جايه لما يقولوا بس. والنبي لما شاف النسوان طالعين ورا الميت رجعهم وقال لهم كلام خوّفهم به زي قولت ارجعوا مالكوش ثواب حرام عليكم الواحدة ما ينوبها إلا ترجع بذنوبها. بقى يختي إذا كان دا كله حرام رايحين نجي فتوى بالحضرات دي منين. وأنت إذا قعدت في بيتك وقريت الفاتحة للسيدة زينب ولَاّ للسيدة نفيسه موش ثوابها رايح يروح لها ودول ناس سرُّهم باتع شي لله يا أولاد النبي. ويعني هيَّا الست الطاهرة تحب الجرجرة وقلة القيمة دي. وشفت ايه يا خيه في الحضرة. والنبي تقولي ما تخبي حاجة يا ستي بهية. ب. آهو والواحد ماشية تشوف دي الجدعان المايصين اللي مسبسبين شعرهم زي قصة النسوان واللي عاوج طربوشه على عينه واللي كابب أو قزازة ملكه على هدومه وماشي يطلَّع لدي ولدي واللي ماسك له شوية ورد في أيده كل ما يقابل واحدة يقول لها تشمي يختي واللي معاخ حبة ملبس وكل ما يشوف عيل مع واحدة يديه شوية لأجل أمه تكلمه. وإن وقفت الواحدة في السوامر تتفرج يبقى الجدع دا ينحك فيها والراجل دا يتمحك فيها ودا يحيي وراها ويقف

ودا يفضل يغمزها ويلعب لها حواجبه. ويمكن يكون فيهم واحد سكران يهجم عليها ويحط أيده عليها بالغصب. ولما تروح الواحدة لحد الجامع تلاقي الجماعة اللي بيفقروا عمَّالين يتعرجوا ويشخعلوا تقوليش يا ستي شريفة إلا هما غوازي أنا عارفة يختي الرقص دا تعلموه فين ولا يختي لما يميلوا على بعض ويبوسوا بعض ودا يلف من ورادا ودا يقصع

وسطه زي الخول ودا يقوم ودا يقعد تقوليش إلا تياترة والنسوان قاعده وراهم ودول كل ما يشوفوا النسوان يطلعوا لهم يزيدوا في الرقص والخلاعة والجدعان التلفانين واقفين ورا النسوان وكل من قدر على كلمة يقولها ولا يختشوا ولا ينقرعوا ولا هم خايفين من الله ولا من سوله. ش. طيب ولما أنت عارفة كدا يختي ايش وداك للناس الهم دول وطلعت في السكة للناس المجرمين والنبي لاسأل ايش وداك لاسأل سيدنا الشيخ سيد أحمد على العمايل دي اهو الحمد لله ربنا رزقنا به الساعة دي. من حق يا سيدنا الواحدة يجوز لها تتفرج على الجماعة اللي بيذكروا في الحضرات ويرقصوا ويشخلعوا وتبقى النسوان والرجالة واقفة تتفرج عليهم. وطلوع الواحدة من بيت جوزها من غير أذنه حرام ولَاّ حلال. س. بقى شوفي يا ست شريفة الجماعة اللي بيذكروا في الحضرات جول ناس خسرة ولا لهم ذمة ولا يحزنون دول جماعة عاملين العبارة دي حجة وحاجة شان الناس تتفرج عليهم وبيذكروا على أدوار المغنى ودي لها أمور حرام شرعاً واللي يعتقد منهم ان دا حلال يكفر وتطلق مراته الذكر له ناس بالعنية يقعدوا في المساجد يذكروا الله تعالى بقلب خالص ولا يرقصوا ولا يشخلعوا ولا يقفوا ينططوا زي القرود ولا يلتووا على بعضهم زي التعابين ولا يعملوا حاجة من الهذيان اللي شايفاها ده ويمكن الواحد منهم يذكر ويعيط خوف من الله ومن شروط ذكرهم أنهم يذكروا وعينيهم مغمضة وقلبهم مشغول بالله ودول يبقى الواحد منهم يرقص وعينيه للمرة من دول ويتنطط وفي جنبه ولد فدى أمور كلها تغضب ربنا وكلها خارجة عن الشرع ولا يغركيش لما تشوفي الواحد من دول يتفتف ويريل ويبرجم ويقولوا ليه واحدة الحال دا

كله كلام كدب وأمور نصب لأجل الناس تعتقد فيهم مع إن الواحد منهم يمكن يكون حرامي ولا سكري ولا حشاش وياما حكوا على ناس بالكلام ده وخدوا فلوسهم وخسروهم وتلفوا عقلهم. هيا الناس الطيبين تستخبا يا أم أحمد دي أمور عملتها الناس كار ويبتعيشوا منها ولكن يا ويلهم من الله يروحوا فين يوم القيامة لما يجوا

وشهم أسود من الدب على الله وحالهم زي الزفت والناس تبقى تتفرج عليهم وتقول شوفوا اللي كانوا عاملين ناس طيبين في الدنيا شوفوا اللي كانوا بدينهم وأقول لك أيه وأعيد لك ايه دول ناس ينبكي عليهم لا حصلوا دنيا ولا آخره. وأما طلوع الواحدة من ورا جوزها مفيش أكبر منه عند الله ذنب كبير قوي لولا يغفروش ربنا إلا لما الواحدة تقول لجوزها أنا طلعت من وراك اليوم الفلاني واليوم الفلاني واطلعت لواحد في الجهة الفلانية وكلمت واحد في العطفة الفلانية يبقى إذا سامحها جوزها يغر لها ربنا وإذا ما سامحهاش يا ويلها من الله لأن احق الزوج يا أم أحمد موش حق ربنا حتى أنه يسامحها فيه من غير إذن جوزها. والداهية إذا كانت تلبس هدومها القديمة في البيت ولما تجي تطلع بره تلبس الهدوم الجديدة وتصلح وشها وشعرها وتخطط ولا تحط البتاع اللي بتحطوه في وشهم زي الصنايبر وتمشي تتعاجب وتوري نفسها للجدعان يا ويل دي من الله ياما تشوف يوم القيامة ياما تلعنها الملايكة وهيا ماشية ياما تحط عليها الأوليا اللي رايحة تزورهم آهي تفضل مسكينة في لعن وسخط وغضب لما ترجع عبيتها وحقاً إن ماتت على كده ولا سامحهاش جوزها قولي يا رحمن يا رحيم عليها. ش. سامعة يا ستي بهية. ب. والنبي